पदाधिकारीका लागि एमाओवादीमा हानाथाप

केन्द्रीय समिति घट्यो, विवाद घटेन

१६ चैत, काठमाडौं ।

केन्द्रीय समितिलाई पूर्णता दिने समय नजिकिँदै जाँदा एकीकृत नेकपा माओवादीभित्र उपाध्यक्ष र सचिव पदका दाबेदारहरुको संख्या बढ्न थालेको छ । केन्द्रीय समितिमा दुईभन्दा बढी सचिव र उपाध्यक्षहरु रहने विधानमा व्यवस्था छ । शनिबार बस्ने बैठकले पदाधिकारी र केन्द्रीय सदस्यहरुको टुंगो लगाउने एमाओवादीले जनाएको छ । केन्द्रीय सदस्यको संख्या ३ सय ९९ बाट घटाएर २ सय ४० मा झारिएको छ ।

समितिमा सीपी गजुरेल र पोष्टबहादुर बोगटी सचिव हुनुहन्थ्यो । गजुरेल वैद्यपक्षमा लागिसक्नुभएको छ भने बोगटी हेटौडा महाधिवेशनबाट महासचिव बन्नुभएको छ । त्यसैगरी पहिले ३ जना उपाध्यक्ष रहेकोमा वैद्यको ठाउँ अहिले पनि खाली रहेको छ । पदाधिकारीलाई पूर्णता दिनका लागि अब एमाओवादीले घटीमा एक उपाध्यक्ष र तीनभन्दा बढी सचिवहरुको मनोनयन गर्न बाँकी छ ।

स्रोतअनुसार बरियताको हिसावले एमाओवादीमा अमिक शेरचन उपाध्यक्षका दाबेदार हुन् भने कृष्णबहादुर महरा, गिरिराजमणि पोखरेल, टोपबहादुर रायमाझी र वर्षमान पुन सचिवका दाबेदार हुन् । लीलामणि पोखरेलसमेत पदाधिकारीका दाबेदार भए पनि बरियतामा उनीभन्दा अघि चारजना नेता रहेकाले पोखरेल दौडमा पछाडि छन् ।

पदाधिकारीका दाबेदारमध्ये पाँचैजना अध्यक्ष प्रचण्डका भरपर्दा सारथी होइनन् । एकताकेन्द्रबाट आएका अमिक शेरचन आफैं प्रचण्डको नभई अलग्गै गुटका नेता हुन् । सचिवका दाबेदार महरा विगतमा प्रचण्डका विश्वासपात्रका रुपमा रहे पनि वैद्य र प्रचण्डलाई मिलाउने भन्दै मध्यमार्गी धारको नेता बनेपछि कतिपयले उनलाई वैद्यनिकट भएको र विप्लवसँग भित्री साँठगाँठ रहेको आरोप लगाउने गरेका छन् । एकताकेन्द्रबाटै आएका गिरिराजमणि पोखरेल नारायणकाजी श्रेष्ठका दाहिने हात भएकाले उनी पनि प्रचण्डका विश्वासपात्र होइनन् । सचिवका अर्का दाबेदार टोपबहादुर रायमाझी त झनै डा. बाबुराम पक्षमा खुलेरै लागेकाले उनीबाट प्रचण्डलाई भर हुने स्थिति छैन ।