निर्वाचन आयोगले कार्यदलसँग छलफल गर्ने

काठमाडौं, चैत १४ –

 निर्वाचन आयोगले चुनावका लागि आवश्यक ऐन, कानून निर्माणका लागि मुख्य दलले गठन गरेको कार्यदलसँग छलफल गर्ने भएको छ । ऐन कानूनको अभावमा चुनावको मिति निर्धारण गर्न नसकिएको भन्दै आयोगले भोली तीन दल र मधेसी मोर्चाले सहमतिको दस्तावेज तयार गर्न गठित ८ सदस्सीय कार्यदलसँग छलफल गर्न लागेको हो । चुनावी सरकार गठन भएर निर्वाचन आयोगले पनि पूर्णता पाए पनि अझै चुनावको मिति निर्धारण हुन सकेको छैन । उज्यालो अनलाइनसँग कुरा गर्दै निर्वाचन आयुक्त दोलख बहादुर गुरुङ्गले संविधानसभा सदस्य ऐन, निर्वाचन ऐन र निर्वाचन आयोग ऐनको अभावमा चुनावको मिति अन्यौलमा परेको बताउनुभयो ।

आयोगको चुनावी तयारी र उसको सुझावका आधारमा सरकारले मिति तोक्ने छ । त्यसअघि नै एक दुई दिनमै समग्र विषयमा सबैदलसँग छलफलको तयारी भएको आयोगले जनाएको छ ।

आयोगका प्रवक्ता अनिल कुमार ठाकुरका अनुसार मतदाता नामावली संकलनमा ठाउँ ठाउँमा नेकपा माओवादीले गरेको अवरोधले पनि चुनावको मिति तोक्न ढिलाई भएको छ । नागरिकता नभएका नागरिकलाई नागरिकता वितरणमा भएको ढिलाईले पनि चुनाव अझै अन्यौलमा परेको छ । तीन दल र मधेसी मोर्चाबीच भएको सहमती अनुसार निर्वाचन आयोगसँगको समन्वयमा गृहमन्त्रालयले देशभर टोलि खटाएर नागरिकता वितरण गर्ने सहमती भएको थियो । तर त्यो काम अझै शुरु हुन सकेको छैन